ዝክረ አድዋ

borkena,Ethiopian News
March 1,2014

ዝክረ አድዋ !

ነገረ አድዋ …ጥልቅ ፤ ምጥቅ
ጸአዳ ዝንት -ዓለም የሚያንጸባርቅ

የወራሪ የታሪክ ለምጥ
የአበሻ የታሪክ ጌጥ
የአበሽ ተድላ ሀሴት
የወራሪ የመንፈስ ፤ የአካል ስብራት

አድዋ የቀን አውራ
የድል አባወራ
የድል ብስራት
የድል ጥሪት
የመንፈስ ስንቅ ያበሻ አንጡራ ሀብት

አድዋ !
የወንድነት ድካ ያበሽነት ልክ ስፍር
የአበሽ የድል ገድል ፤ የድል ስንክሳር
የማይበገር ጀግና ትውልድ
የደም ፤ የመንፈስ ውልድ
የኛነታችን ማህተም ፤ የኛነታችን አሻራ
የመንፈስ መጽናኛ በሌሎች ጥቁር ሕዝቦችም ጎራ

አድዋ !

የአበሻነት እና “”የነጻነት ” የቃል ኪዳን ውል
የእምቢ ለሀገሬ ፤ እምቢ ለነጻነቴ ብሂል
“ዋ ኢትዮጵያ ! እኔ ላንቺ ልሙት ፤ ልከንበል ”
ይሄው ነው ያድዋ ትርጉሙ
ሃበሻ የጻፈው የሳለው በደሙ !

ሰው ሲደመም ጡብ ፤ ሲሚንቶ ፤ ፌሮ ተስማምቶ ሰማይ ሊነካ ሲንጠራራ
አበሽ በዛቱ ፤ በልቡ የማይፈርስ ሰማይ ጠቀስ የድል ክምር ሲሰራ
የሚታይ ከየትኛውም ስፍራ …
እኛማ ለምን አንኮራ ?!!

አድዋ ትዕይንትም ነው
በአንድ በኩል ቀልበ ጡሊ የሰው አገር ሊወር የወበራ
በሌላ በኩል ገራገር አበሽ ፤ግን ለነጻነቱ የማይመለስ ሞት የማይፈራ
ስንት የሴት ወንድ ፤ ስንት የወንድ አውራ
ጎራዴ የያዙ እጆች የተፋለሙበት ከባለመትረየስ ጋራ
የስጋና የመንፈስ ስምምነት ፤ የ “ልሙት ለሀገሬ” ፍካሬ
የጽኑ ነብስ ፤ ጽኑ ስጋ የመንፈስ ዝማሬ ፤ የተጋድሎ ፍሬ
ያገር ፍቅር እና አልሸነፍ ባይነት
ወራሪን እንደ ሰንጋ የመተሩበት
ያበሻ ማንነት የታየበት
ዝንታለም የሚታወስ ትዕይንት!

የአድዋስ ቅዱስነት !!!

እንደ ክርስቶስ ስቅለት
ለሰው ልጂ ፍቅሩን እንደገለጠበት
አበሻ “ለነጻነት” ያለውን ቀናዒነት ያሳየበት
የደም ፤ ያጥንት አስራት በኩራት ያስገባበት
ህቅታውን ከነዛቱ የሰጠበት
የድል ጥሪት ፤
መንፈሳዊ ሀብት
የሀበሻ ኩራት !!

አድዋ የድል አውራ
የጀግኖች ኢትዮጵያውያን
የልብ ምት፤ ያገር ፍቅር ስራ !!

አድዋ !

ከድሜጥሮስ ብርቁ

መረጃዎችን ለማግኘት ይሄንን በመጫን በፌስ ቡክ ላይክ ያድርጉን